IKLAS KU

iklas wan i ate ku ike turah pe musirang,

mungkin rasa sayang nge osop aru ate mu,

buet mudemu roan te gere pernah memang,

tape lepas mubayang ki budi jeroh mu..............

kin janyi mu gere mukunah kao lupen,

si ku harapen buge kao bahagie,

gere mukunah luke si ku nenong si ku tehen,

kadang ara kesalahen si gere ku sengeje,

enguk mi kire kase i maaf'n................

SELAMAT JELEN

SELAMAT JELEN KETA REROAN MU,

BUGE MI SELALU MUNEMPUH TUJUEN,

ENGE KU DO'ANEN KIN BELOH MU,

KIN JANYI MU GERE MUKUNAH KAO LUPEN...............

GELAH I OSOPEN BEKAS NI PUMU,

KIN GERAL KU ENTI NAE ARA WAN INGETEN,

GERE MUKUNAH I APUSEN KISAH TE SI LALU,

LUKE NI ATE KU GERE MUKUNAH NONG KU TEHEN................

GERE KU SANGKA

GERE KU SANGKA BEN KU SUEN TIBE-TIBE LAYU,

DENEM WAN ATE KU ENGE TARING BASA,

GERE NAE ARA SI KIN KEKALE NI ATE KU,

KAO BUNGE KU NGE OSOP ARI MATA..............

BUGE ENTI KIRE ARA SAKIT RASA NI ATE KU,

BIER PE RUES MU GERE NAE NYATA,

LEMUT NI KATA OROM SUMPAH SETIE MU,

BESILO MUSEBU NGE MUJADI AMPA...............

I LUPEN KO MI KETA KISAH OROM AKU,

RASA NI ATE KU MUNGKIN SI TURAH BIMANG,

SABE MUNIMANG UES WAN I ATE KU,

BUNGE PE NGE LAYU KERNA KERING CABANG..........

IKE REMENANG PE LAOH ARI MATA KU,

HARAPEN KU KAO PADEH NE SI SENANG,

AKU SI MUNIMANG BEWEN E SEBU KU,

IKLAS ENGE ATE KU OROM KAO MSIRANG...............

ENTI KIRE ENTI NAE INGET I,

GELAH I LUPEN KO MI SUMPAH OROM JANYI,

BUGE SENANG MI KASE MOREP MU ENGI,

PURN ENTI SESAL I IKE SI ENGE TERJADI...............

BUGE BAHGIE MI

UNTUNG GERE ILEN JARAK KIDING KU LANGKAHEN,

MEMANG BESILO GERE LEPAS NAE KAO KU ENGON,

KISAH ROAN TE SENI TARING KENANGEN,

SI GERE LEPAS ENGUK KU LUPENEN.............

KAO SI KU HARAP MALE KIN TUNGKELEN,

TAPE BEWEN E SIE-SIE MUNIMPE KU BEDEN,

PERAU MUKARAM GERE ILEN BELOH ARI PELABUHEN,

UES NI ATE TERASA GERE TERTEHEN...........

ASAL KE BETA PE MALE KU KUNEHEN,

KIN OSOP MU TURAH WE KU DO'ANEN,

KERNA KAO WE SARA KIN TAWAR NI BEDEN,

KIN AMPIS NI SIRE IKE GAEH UREN.............

BESILO ENGE TURAH REMO NI AKU BEDEN,

KERNA GERE NAE ARA PAYUNG PELONGOHEN,

BUGE BAHAGIE MI MOREP MU PUREN,

KADANG KU ATAS DIRI KU NGE BETA TAKDIREN..............

GERE SEMPAT I RASANEN

SELAMAT JELEN KU UCEPEN,GERE MUKUNAH UES SI KUTEHEN,

MUNGKIN HARAPEN NUME KIN TUAH,

ANGGAP MI BERAKAH SI NGE BEJELEN.............

KAO KU LUAHEN NUME KERNA BENCI,

TAPE WAN ATE NI KAO GERE TELUPEN,

GERE KU SALAHEN I LUPEN KO JANYI,

MANIS NI PERI EREP KIN KIESEN...................

SARA WE HARAPEN I WAN ATE NI,

BUGE BAHAGIE MI MOREP MU PUREN,

GERE LEPAS KU NIETEN MUNGENEL PENGGANTI,

KERNA MENET DI KAO SI SENANG PUREN.............

GELAH I MA'AFEN KADANG AKU ARA SALAH,

KERNA JALIN NI KISAH GERE SEMPAT IRASANEN,

KERNA WAN PERJELENEN I TURUH KO FITNAH,

TAPE GERE MUKUNAH DERITA SI KU TEHEN...........

SELAMAT MI KO MUNUNUNG JELEN..............,

OROM IKLAS NI ATE KU UCEPEN.................,

KIN AKU ENGI KU ENTI ARA WAN INGETEN.............,

GERE MUKUNAH KENANGEN PAIT LAGU EMPEDU..........................

JARAK MI

Bier  gere mokot ramah ilen,

Kin rues e  gere terlupen,

Mungkin enge beta takdiren,

Ari tuhen si kona ku ate…………..

Ke beta peg ere mukunah,

Ues ni ate si ku emah-emah,

Ku anggap nume kin tuah,

Bier mupisah ari rues e…………

Besilo bewen e enge terjadi,

Buge enti mi nae inget I,

Kerna nge lupen kao kin janyi,

Manis ni peri lungi ni madu………..

Kin sumpah mu sig ere setie,

Ku anggap cobaen ku rembege,

Tape ku do’anen buge kao bahagie,

Bier pe luke rasa ni ate ku………………

JARAK MI ENGI KAO ARI AKU,

ENGE GENAP UES NI ATE KU,

GALAK MI ENGI KAO REROAN MU,

ENGE IKLAS RASA NI ATE NI……………

Gere ku sesal I ike mupisah,

Bier sekejep terjalin ni kisah,

Gere nyata ilen kite ramah,

Gere mujadi uah nong motek ku……..

Harap ku kao kintungkelen,

Buge kin paong morep ku puren,

Gere ku sangka mutuker jelen,

Gere sawah ku tujuen kite enge mucere…………

Sakit memang rasa ni ate,

Kerna ku tehen turah luke e,

Bier bimang rasa wan I ate,

Mungkin mupisah jelen si jeroh e………………..

ANGGAP KO MI BERAKAH

untung motek gere ilen mujadi uah,

untung tuah gere ilen ues rasa ni ate,

ike beta pe gere mukunah,

mungkin langkah si gere mu dene...........

ima'afen ko padeh ne kadang ara salah,

kerna enge berubah besilo jelen si kutunung pe,

cerak ku mane buge anggap ko mi berakah,

kerna gere ara sumpah si si mununung e............

selamat padeh ne ucepen ku si sawah,

buge mi kao berlangkah selamat mi kase,

mungkin oya si jeroh e ku jelen i turah,

ari Tuhen si sawah ku terime bewen e....................

LEPAS KE DIE DEMU

wan tengah melem aku pebening, 
ku guel soleng ganti ni perinu, 
denem ni ate ku betul sinting, 
ku guel teganing kin pelale ni ate ku....... 
I atan atu aku berjunte, 
sabe bersere kubatang si rubu, 
harap ni ate ku enti kire murense, 
buge mi kase lepas ku demu........ 
Paong morep ku nguk kin penane, 
kune die kase sawah ke si ku tuju, 
gerak ni langkah ku enti kire sie-sie, 
enti sempat kire sakit ate ku....... 
Kao bunge ku isihen kin besilo, 
ara ke ibayang ko engi rues ku, 
harap ku buge sawah susun ni belo, 
kin pemango sinte mu orom aku.......

GERE KU TIRO

gere ku tiro lungi ni madu, 
ike ara ilen lungi ni gule, 
gere mungkin sakit ate ku, 
ike semasih ilen kao setie....... 
Gere ku harap kulem sikolak, 
si kerna ara ilen telege tetibuken, 
gere ku harap kaol ni cerak, 
ike betul setie kin perjanyien.......... 
Tape ternyata kao si berubah, 
ingker i ko sumpah i masala lalu, 
tape ate ku tetap we tabah, 
si kerna gere sempat sawah si ku tuju........ 
Kerna sifet kotek mu besilo teridah, 
mungkin nume tuah kao wan morep ku, 
maaf ari aku kadang ara salah, 
anggap ko mi berakah i masa lalu......... 
Gere mukin beloh aku ike kao setie, 
nge pasti ku terime temas nyanya ni morep mu, 
gere mungkin ku luahen kin beloh mu, 
ike sengkire gere jengkat becerak mu.......

SENGUK BERSEBUKU

i cahaya ni bintang berukir geral mu, 
wan ulen si terang ku engon rupe mu, 
suntuk ku kenang kin rues mu, 
ate ku senang muninget kin si lalu....... 
sabe terbayang kin osop mu, 
lagu remang2 penengon ku, 
laoh mutuang nong ku dagu, 
ate ku bimang mutamah karu............ 
Olok pedi sayang kao bunge ku, 
i lelah ni belang eyop2 kuyu, 
wan melem tayang senguk bersebu ku, 
si kerna batang gere ne muperdu.............